الخطوة الأولى :
تلتزم بالتسع خطوات اللى جايين حرفياً من غير ما تحاول تفتكس او تضيف البصمة بتاعتك
الخطوة الثانية :
الأستوديو كل يبقى فى منطقة زحمة وشعبية كل يا تكسب اكتر وياريت يبقى جنب موقف ميكروباصات تبقى العملية لعبت معاك او مدرسة بنات ثانوى صنايع يا سيدى على الدلع ( ملحوظة مدارس البنين مبيجيش من وراها الأ وجع الدماغ ركز مع البنات ) وياريت كمان شبابسائقين التوكتوك يحبوا شغلك
مثال للمناطق المقترحة من جانبنا : ابو قتاته- زنين – عزبة ابو قرن – ناهيا – دار السلام – المعتمدية)
الخطوة الثالثة:
بالنسبة للتصوير كل ما تزود فى الحركات المحبوبة والمعروفة والتقليدية كل ما الزبون يحبك يعنى مثلاً القطات الفنية يبقى الزبون قاعد وايدة تح خدة او باصص للأرض بحزن وتأمل او حاطط رجل على رجل ولو عريس وعروسة يمسكوا ايدين بعض ويبصوا للكاميرا ويضحكوا ولو اتنين اصحاب بقا تلخيهم يمسكوا ايدين بعض كأنهم بيلعبوا رست ويا سلام بقا لو قادر تصرف يبقى تجيب جيتار حلو كدة ومش مهم بأوتار او من غير اوتار واصلا مش مهم يكون حقيقى ممكن يبقى بلاستيك
الخطوة الرابعة :
نزل نسخة فوتو شوب مضروبة من على الانترنت ومتسبش فى وش الزبون ولا حباية ولا شعرة من شنبة ولا من حواجبة منكوشة ولو عندة نسبة حول اعدلة عنية لازم الزبون ميعرفش نفسة وعليك بقا بتلوين العيون أشى أخضر وارزق وعسلى وأكثر عزيزى الطالب من الخدع وتكرارالصور لنفس الشخص وياسلام لو تكتر من الصور اللى فيها الى فيها خدع وعلامات مائية واتوصى بالخلفيات اللى فيها نجف كتير وسلالم من بتاعة فندق مينا هاوس
الخطوة الخامسة:
الكتابا ت :
بدون شك علشان تبقى مميز لازم تسمع كل ألبومات موسيقار الاجيال مصطفى كامل واقتبس منها احلى كلام بقا واقوال ماثورة ودلع الزبون
أمثلة :
أقوى من الايام : زبون بيلعب حديد
قشطة يابا : واحدة اهلها بيصوروها وهيجيبولها عريس سعودى
أيام وعدت :أتنين اصحاب بلبس الجيش قبل ما يخلصوا المدة ( متنساش ما ورد ذكرة سابقا وتصورهم فى وضع الرست )
أنا مسامح : زبون خارج من قصة حب عنيفة
روح قلبى : ( مع اضافة حرف ال m) علشان المزة اسمها منال
ولو عايز تطور من نفسك اسمع اغانى تانية واقتبس منها زى اغانى الاستاذ عبد الباسط حمودة وخصوصا انا مش عارفنى وحمادة هلال برضة بيجيب مع الناس
ولو حسيت ان زبونك من حته شيك عليك بالكلمات الانجليزية المأثورة وكلها بتنتهى بكلمة love
Love 4 ever
Love me
Love you
كلة بال love
الخطوة السابعة :
خدمة العملاء واللباقة
القاعدة الأولى فى علم خدمة العملاء ان العميل دائما على حق يعنى الراجل لازم يتبسط ويتكيف طالما دافع فلوس ولازم تبقى بتتكلم زى الزبون يعنى لو قالك يازميل ترد علية وتقولة يا شقيق ولو قالك اعمل معايا واجب ترد عليه وتقولة هعمل معاك ال nike
الخطوة الثامنة :
الريكلام
علق فى الاستوديو على قدر ما تقدر صور بنات كتير وتكون مغرية او حتى لو معندكش علق صور فنانات هاتهم من على الانترنت علشان البنات اللى تدخل الاستوديو بتغير من الصور اللى متعلقة فبتتصور أكتر علشان بتحاول تطلع احلى او علشان انتا تطلب منها انك تعلقلها صورة فى الاستوديو وطبعا هيه هترفض ودا مش مهم المهم انها تدفع اكتر وهيجيلك برضة زباين رجالة علشان يتفرجوا على الصور اللى عندك وبامرة هيتصورة صورة ولا اتنين علشان الاحراج
الخطوة التاسعة
الاعلانات
1000 ورقة a5 ب 60 جنية وتزعها قدام الجامع بعد صلاة الجمعه او قدام مدرسة البنات اللى جنبك او فى موقف الميكروباصات اللى قريب منك وعلق يافطه قماش تهنئ فيها أهالى المنطقة بالعيد ولما يجيلك فرح ومعاة زفة موتسيكلات خد وقت طويل فى تصوير العروسة علشان امنطقة تعرف انك شغال كويس ويبقالك صيت فى المنطقة
الخطوة العاشرة
تكتب كتاب عن اللى هيحصلك فى هذا الاستوديو
(كتاب حياتى ياعين ما شفت زية كتاب )
الله يرحمك يا حسن ياأسمر
