صوره زفاف .....

عن الأنسان المصرى و الزواج نتحدث .... !
حالة يصعب على الكافر ..!
يااااة دا طلعله كرش
أوحش أوى الواد بعد الجواز
شوف نازل مبهدل ازاى
قدمها قدم الشؤم
يا بنى غير عتبه
دا من وجهة نظر الناس انما من وجهه نظر البنى أدم المتجوز موضوع تانى خالص وبالأخص لما يتعامل مع الجواز وهوة الجواز  قدامه  عبارة عن شكلة فى صورة الفرح
عموما من الأول أهم حاجه يوم الفرح الصورة حتى أهم من الفيديو لأن دى الحاجه اللى المدام بتكون مجهزالها مكان جنب النيش او فى الصالون  علشان تحطها فيها وبيختلف حجم الصورة اللى بتتكبر على حسب المقدرة المادية للعريس ولسه قادر يدفع ولا خلاص بيطلع فى الروح ......
 

 
قبل الفرح
الحساب كام؟ ...مش كتير؟ ما تخليك حنين معايا شويه فى السعر دا انا عريس وبتجوز النهاردة وتجوز عليا الصدقة...... دا على أساس اني هيصعب عليا حالته واوصرة بنص التمن  بس انا مع الخبرة والوقت اتعلمت أرد على اللى يقولى كدة واقولة وانا متجوز من كذا سنه يبقى هتدفع زيادة علشان تشجعنى انى أكمل واصبر على الجواز دا انتا لسه فى أيام الدلع ..المهم بعد الفصال والأتفاق على الحجم والشوية بتوع تفتكرى  يا حبيبتى صورتنا هتبقى لايقة  على لون الحيطة وهيه ترد تقولة اللون اللى انا أخترته يا بيبى وكان مش عاجبك ...................................صبرنا يا رب..   
 
بعد الجواز بكام أسبوع
اللى نسى يعمل بقا  صورة كبيرة من صور الفرح يشرفنى ويأنسنى فى الاستوديو وبعد التحيه والتشجيع والسؤال المعتاد منى الجواز عامل معاك ايه ؟طيب الحمد الله ربنا يسعدكم على طول المهم عايزة الصورة ورق بس ولا ببرواز مدهب ولا خشب ولا مقاسها قد ايه ؟ وتأتى الرياح أحيانا بما لا تشتهى السفن وأسمع رد بكرههه جداً  بودانى شوف أيه أرخص   حاجه وأعملهالى ..... أخص ( ياراجل يا ناقص قلبك طاوعك تقولها ؟
 واحد تانى يفرحنى ... أأمر يا ريس ؟
 أحسن حاجه وأنضف حاجه ...( أفرح أنا كدة أوى) ... خلينا نخلص بقا من الزن بتاعها علشان انا قرفت ..!!!!
   
بعد الجواز بفترة كبيرة
هيه هيه بقا نفس الصورة من وجهه نظر العريس بعدالجواز  بعد حسابها هيبقى كام يفكر أزاى هتتحط  فى الصالون قدام أصحابة اللى جايين يباركولة وهيه بيبوس فيها مراته اوازاى اصلا يدارى كتفها ( كتفها بس محدش يتخيل حاجه تانيه خليكوا محترمين ) اللى باين فى الصورة وهيه أصلا محجبة بس كانت خالعاة فى الفرح علشان مامتها قالتلها دى ليلة العمر لازم تفرحى  ولما يقعد بعد فترة من الجواز متخانق معاها مش عايز ينام جنبها ونايم على الكنبه فى الصالون  ويبص للصورة ويسرح ويقول كان يوم أسود ولو طلعت دلوقتى رغت فى نفس الخناقه هكسر البرواز والصورة على دماغها وابقا ضربت عصفورين بحجر خلصت منها ومن الصورة اللى مفكرانى بيوم ما اتهفيت فى دماغى او يمكن يسرح فى الصورة وهوة متخانق ويفتكر أيام ما كانوا عصفورين كناريا بيتضرب بيهم المثل فى الحب والغرام أول الجواز ويقوم يقولها متزعليش منى تعالى نتصالح وخشى شويه خدينى جنبك على السرير  .........!!!!!!!!

الأفكار دى وصلتنى عبر مئات الرجال المتزوجين وعبر سنين من التعامل مع صورة الفرح وبكدة يكون لصورة الفرح مكان مؤثر جدا فى الحياة الزوجية بسلب او بالأيجاب وربنا يصبر بقا من سولت لة نفسة بالجواز واللى ياكل على ضرسة ينفع نفسة ......... 

الأستوديو.......

الأستوديو عالم صغير ومنتاهى الصغر فيه كل أصناف البشر منهم اللى على طبيعته ومنهم متصنع شخصية تانيه غير شخصيته ومنهم البشوش ومنهم العبوس منهم العالم وفيهم الجاهل 

الأستوديو مفتوح لكل الناس مش بيفرق بين البشر لأن الكاميرا مبتفهمش الفرق  بين اللى لابس بدله واللى لابس جلباب مع اننا بنفهم وبنفرق بينهم فى التعامل 

الأستوديو أتعود على التعامل مع الأنسان كأغرب مخلوق فى الكون وبيخاف منه 

الأستوديو مش بيحب حد لكنه بيكرة كل التزييف وتغيير الحقائق مع أنها بتحصل كلها جواة وفى غرفه 

الأستوديو جماد عاقل 

الأستوديو يتغذى على الأخلاق

الأستوديو بيفهم  كل اللغات ويتكلم لغه الصمت 

الأستوديو طيب ولكنه أحياناً مفترس

مفتوح طوال أيام الأسبوع وطول ما فى كهرباء

مفتوح على الشارع 

أهلاً بكم 

 فى 

الأستوديو 

يوميات مصور مغمور

( مش مغمور أوى)

أنتبه الدنيا بترجع للخلف .... !!!!

الصدفه وانا لسه مخلص شغلى فى دار مناسابات وافراح وليالى ملاح تابعه للحكومه 

وتابع لدرار المناسبات  دى فندق 

وكنت واقف مستنى تاكسى قدام البوابه الرئيسيه والوقفه طولت اوى اوى

وقفت اتفرج على عساكر البوابه شويه لاحظت ان الدخول واجراءات الامن شديدة

وفجأة لقيت العساكر وقفوا  واتعدلوا واترصصوا وبيبصوا على الفساتين السواريه اللى جايه تدخل الفرح

وكل واحد مركز فى حته فى حته من الحتت اللى بتعدى ولا عسكرى

 فيه بينطق وبيسئل الناس دى رايحه فين ولا حتى فين يا أخت دعوة الفرح ولا حتى داخله لمين جوة 

كلنا كنا مبسوطين ( انا والعساكر يعنى) وبنضحك وفجأة لقيت وشوش العساكر اتقلبت واتعكرت 

ولقيت راجل محترم جاى( لابس بدله شيك اوى) على البوابه هوة 

واسرته وبناته والعساكر عماله تبرطم بالكلام 

واتارى ان المشكله كلها( بالنسبالهم) ان الراجل ملتحى ( بدقن يعنى وشكله متدين)

ومراتى منقبه وبناته محجبات ومش باين منهم حاجه تقريبا غير وشوشهم 

لغايه كدة وانا معنديش مشكله انما اللى هزنى وضايقنى انى لقيته ممنوع من الدخول 

ليه ياعم الحاج ؟ ممنوع دخول الملتحيين والمنقبات

والراجل واقف بكل ادب وزوق وبناته باصين فى الارض 

والاحراج بقا 

 والسورايه والصدور والشعور بيدخلوا من غير اى ما حد يقولهم

 رايحين فين حتى و بيضرب لهم تعظيم سلام كمان

يعنى ايه كل حاجه حلوة وكل القيم تتشقلب 

يعنى ايه الصح يبقا غلط

نطرد العلماء والائمه او نحاربهم 

ونحارب الاحترام 

واحد صاحبى قالى البلد ماشيه بـــ #$%^&* ولا بلاش اقولها

وأفتكرت كلام حمدى قنديل اللى تسببت فى ايقافه والغاء البرنامج بتاعه 

اة يا امة جاحدة يا امة ناكرة 

يا امة ذليله يا امه واهنه

يا امة تلفانه يا امه عدمانه

يا امة اونطه

ياامة كل اللى شاغلك مسلسل تامر وشوقيه 

يا امة كانت امة محمد بقينا امه مهند

وحسبى الله 

يوميات مصور مغمور 

نشرت فى مجلة أحنا 2010

صورة للشغل

سلام عليكم

 أحدثكم الأن من أمام مكتبى المتواضع فى يوم صيفى حارق ومروحتى المسكينة مش قادرة تهوى على نفسها وبتقولى عايزة حاجه ساقعة  زارنى  زبون حران زى حالاتى  دخل عليا بالبد له التيل نادية البيج وفى جيبة أربع أقلام جاف من أبو كل واحد فيهم بلون مختلف واللبيسه طالعه بتعلن عن لونها  وصلعة بتلمع من العرق ولازق فيهم كام شعرايه كدة لزوم التزيين فى الخمسينيات من عمرة ( يلا حسن الختام )
يلا  بينا على الشغل....


انا : أأمر يا باشا
 هو : عايز صورة للشغل
أنا :  اتفضل
هو:(بدون سبب واضح ) انا أصلاً مبطيقش الصور ولا التصوير
أنا : خير ليه بس هصورك صورة حلوة ان شاء الله
هو : أصلاً انا مش عارف أيه لازمة الصور الجديدة ما القديمه عندهم فى الملفات أيه يعنى من 15سنه وأبيض واسود ما أنا هوه أنا يعنى هوه انا هجيب واحد تانى يشتغل غيرى
- بالك - محدش يقدر يستحمل دا أنا حمال قاسية دا عيشة بقت تقصر العمر
صور ياعم صور خلينا نخلص

أنا :أتفضل أقعد وافرد ضهرك
هو : ( يضحك بسخرية) أفرد ضهرى أيه يا بنى هوه انا فيا حيل أصلاً  افرد ولا أتنى دا انا شغال زى البهيم فى الساقية دا حتى البهيم بيغموا عنية وأحنا لأ بندوخ ومبناخدش راحه هنلاقيها من الشغل ولا من البيت ولا من الحر ولا من المواصلات
أنا : .... ( ساكت أما نشوف أخرتها )
هو :( يسترسل ) عارف : الموظف مننا بياخد ملاليم طول عمرة ومستحمل يجيبلوة مدير يطلع عين أهله ومستحمل ينقلوه ويأخروا ترقيتة يستحمل أنما بقا البلاوى اللى بتتحدف علينا كل كام يوم على الشبابيك فى المصلحة ( ظهرت الرؤية بقا بيشتغل فى مصلحه حكومية أكيد وموظف شباك ) اللى يطلع من الطابور ويجيلى من الباب واللى يتخانق مع اللى وراة علشان عامله حاجه عيب واللى عطس فى قفا اللى قدامه واللى يحطلك جنيه ونص فى جيبك ويقولك الشاى بتاعك
هو : أحكيلك بقا ما انتا زى أبنى وائل امبارح كان عندى طابور طوله تقريباً شارع كل واحد واقف معاه ملف وورق كتير وممعاهمش قلم واحد يوحد ربنا قولى بقا أصرف على الحكومه انا بقا ولا ايه بياخدوا القلم ومحدش بيرجعه ولاد الحراميه واحد تانى قلته طلبك هيتوافق عليه بكره قالى أيه بقا القمور حبيب ماما ؟
قالى بس انا مسافر بكره المصيف... !!!
قولى بقا أشخر ولا ألعنله سابع جد ؟
أنا :( طبعاً كأنى مش موجود أصلاً ) روق دمك بس أجيبلك حاجه ساقعه
هو : هوه بقا يا بنى فيه أسقع من الناس اليومين دول يا بنى دا انا ليا الجنة والله من صبرى عليهم أقولك ياعم واحد من كام يوم بقوله روح هات استمارة من البوسطه قالى طيب بليز أروح أقولهم أيه ؟
والنبى دا مش يفقع .... ( المرارة) ويعلى الضغط عليا
أنا : ( ماسك الكاميرا وفاتح بقى ) طيب ركز معايا بعد أذنك
.........

تم التصوير بحمد الله وطلعنا نكتب الإيصال
سألته
: اسمك حضرتك أيه
هو :
أنا : ( وانا بطلع دفتر الإيصالات )10 جنية
هو : أتفضل ( وبيمد أيدة بالعشرة جنية العرقانة الشقيانه )
وانا ببقا بفتح دفتر الإيصلات وهكتب ملقتش ولا قلم معايا ولا فى المكتب وطبعا الأحراج بقا مع الحر مع تفكيرى فى اللى هيعمله فيا لما أقوله ممعايش قلم .. المهم خد بالة وانا بدور بأهتمام فى درج المكتب
وبدأت نظرات الأحتقار تشتغل وانا عامل نفسى عبيط طلع قلم من جيبه ومد أيدة وقال


: خد قلم أهو ما انا خلاص يا بنى بقيت أعرف من اللى بيبقى معاه قلم
ومين اللى بيفضل طول عمره يدور عليه

....(يوميات مصور مغمور ( مش مغمور أوى
2010

ليه يوميات ولية مصور وليه .... مغمور ؟؟

هيه أولاً مش يوميات بالمعنى المعروف بمعنى أنها مش متصلة ولا متسلسلة يعنى ممكن يوم من سنه ويوم من أسبوع كدة بصرف النظر هيه أتسمت يوميات واللى حصل حصل واللى فية الخير يقدمه ربنا بس عموماً هتبقى بدون زكر اسماء ولا تفاصيل أشخاص ولا أماكن بالتحديد اليوميات بتحكى عن اللى حصل  خلال شغلتى كمصور
لية بقا مصور ؟؟؟ هوة أولا نصيب بس انا من زمان بحب أكتب واقرأ بس التصوير مشى معايا  من أكتر من سبع تمن سنين وحاليأ انا  بصور فى أكتر من مكان وأكتر من مجال من تصوير للناس العادية  فى الأستوديو الشعبى اللى أملكه ان واخويا  لتصوير صحفى فى مجلات لتصوير فنانين  للذى منه...............
بالنسبة لأنى مغمور فالأرزاق على الله  متشغلوش بالكوا بالموضوع دة دلوقتى ....