الاثنين، 22 أغسطس 2011

صورتى وأنا فى الجيش

كام واحد دخل الجيش ؟
طيب كام واحد فاكر صورة الجيش بتاعة التعبئة ؟
فاكر أصحابك فى الوحدة ؟
معاك صور ليهم ؟
......
السلام عليكم
- وعليكم السلام
-عايز أطلع على الصورة دى يا كا بتن لوسمحت ( صورة مجموعة من الشباب لابسين مموه ومقرفصين على الأرض ومنهم اللى بيأكل نص بطيخة واللى فى أيدة شوية لب أبيض وواحد بيشرب سيجارة وحاول عينية وباصصلها بعشق وسرحان ومع أنهم متصورين فى الشمس وواضح فى الصورة أنهم عارقانين الأ انهم شكلهم مش متضايق )
- عنيا الأتنين  يا دفعة 
قعد على الكرسى جنبى وبدأ يتكلم بلهجة فيومية بنى سوفية 
- هوة أنتا دخلت الجيش؟
- لأ الحمد لله محصليش الشرف بس أتفرجت علية أصحابى حكولى 
-عارف الجيش بيعرفك على ناس عمرك ما تفكر أنك تعرفهم قبل كدة ( قديمة وسمعتها كتير أوى من أصحابى ) وسيبك انك بتشوف الويل ووساخة من ناس وسخة وذل من كان ظابط وساعات بيبقى فى مد أيد كمان 
- ( الحمد لله أنى مدخلتش ) مش دايماً ياعم فى ناس مرتاحة 
- لأ مرتاحة أية دا احنا انا والعيال اصحابى دول كنا بنشوف الويل ياجدع دا احنا كنا تحت ظابط بيأكل عيال صغيرة وبيشم بارود وعلى كدة دى كانت أحسن أيام فى حياة الواحد والله , سيبك من أنهم عيال وسخة بس الواحد مننا عرف مين الراجل ومين اللى مش راجل ومين اللى أصيل ومش قليل الأصل , خد عندك مثلاً المنايفة مش بيقولوا عليهم بخلاء ومعفنين لأ والله عرفت واد بميت راجل 
وكان عندنا شاويش دمياطى ومروقنا أجازات 
-هوة انتا كنت فى سلاح أية ؟
- سلاح المنجدين أصل انا منجد أفرنجى 
- ياعم أومال لو كنت فى حرس الحدود كنت عملت فينا أيه ؟
- ومين قالك أننا مشفناش شقا ومرمطة , دا احنا كنا بننام واحنا واقفين زى الخيل وبنشتغل ليل ونهار أشى كنب وأنتريهات وأشى ستاير وفوتيهات أومال انتا فاكر أن الباشا الظابط هيعرف يشتغل من غير ما يكون قاعد على كرسى متنجد صح , وأحنا كنا بننام على خشب بس مهم أهى أيام والله كانت حلوة , العيال وحشونى أوى ولاد الكلاب كل ما أفتكر اننا قعدنا 3 سنين نأكل سوا ونشرب سوا ونحشش سوا كانت أيام حلوة والله 
- تحششوا ؟؟؟
- أة ياعم أومال انتا فاكر اية فالجيش يوم كدة ويوم كدة دا انا كنت اعرف واحد فى منطقة التدريب كان هيموت ويشرب سيجارة بانجو وكان صعبان عليا الواد مدمن بجد, تخيل بقا  بتصل بية بعدها بشهرين لقيته فى القوات اللى راحت تحرق غيطان البانجو اللى كانت مزروعة فى الصحرا أبن الكلب المحظوظ مبقاش يشرب بالسيجارة بقا دا بيولع فى الغيط ويقعد يشد من الزرع يعنى شرب بانجو يكفية 10 سنين كمان 
- ( ضاحكاً ) طيب وانت زعلان لية مش أنتا منجد
- ( وهوة متضايق أوى ) أة منجد بس بشرب بانجو 

عن النجاح وإبراهيم الفقى


قرأت كتير أوى فى علم التنميه البشريه ظناً منى انها الطريق الوحيد للنجاح والتفوق وربح الأموال والرضا عن النفس لكن وبعد سنين فى الشغل والشقا والتنطيط فى كل الأماكن لقيت الموضع أبسط من الكلام اللى قريته بتاع أحضن نفسك وخد شهيق كبير وطلع الزفير من ودانك
 لألألألألأ الموضوع مش كدة خالص أوى بمعنى أخر مش بالصعوبه دى ولا بالمصطلحات
  بحكم عملى فى التصوير الصحفى فى مجلة أحنا اتاحت ليا فرص عظيمه انى اقابل كم 
هائل من الشخصيات الناجحه فى كل المجالات واتكلم معاهم واقارن بينهم واطلع الاختلافات والتشابه
 أمثلة :
 ايه التشابه بين تامر حسنى ومحمود سعد ومصطفى حسنى وأحمد مكى وابو تريكه   
عبد الباسط حمودة 
طبعاً تناقض قوى  بين الأسماء تخيل بقا كمان لو ضيفنا عليهم أحمد سبايدر .....
الإختلافات اللى بينهم كتير جداً  وغالباً لا يتفقوا فى أى صفه من صفاتهم 
وتتنوع ما بين مثقف ومدعى وفاهم وجاهل  وموهوب وهادف وسفيه 
بس فيهم حاجه واحد خدت بالى منها صفه واحدة بس  تكاد تكون متماثله 
ايه التشابه اللى بينهم فى حياتهم اللى خلانا كصحافه ندور عليهم ونهتم اننا نقعد معاهم ونصورهم كمان 
لأن كلهم نجحوا بصرف النظر عن مفهوم النجاح الأكاديمى انما على الأقل كلهم نجحوا فى أنهم يوصلوا للى هما نفسهم فيه 
راجع بقا معايا مين منهم بيواظب على تمارين الشهيق واطلق المارد بداخلك وأصنع من الليمون عسلاً  والكلام دة 
لأ المعادله أبسط من كدة فكر ونفذ وصمم ومهما حد حاول يقولك أنك غلط أو فاشل أو مش مجالك متسمعلوش
أطلع من نطاق المألوف والعيب , الموضوع سهل و النجاح قريب
ولو فى صعوبات فى الطريق اللى انتا بتحبه هتستمتع وانتا بتتغلب عليها ......
دا التشابه الوحيد اللى شفته فى كل مشاهير الأدب والفن والسياسه وحتى مشاهير الهلس والهشك بشك ومدعيين العلم 
شكراً أستاذ إبراهيم الفقى الموضوع أبسط من كدة 
سمير عز 
من كتاب يوميات مصور مغمور ( مش مغمور أوى يعنى )
هذة التدوينة برعاية أحمد الطويل