السبت، 26 مايو، 2012

مقولات فى التصوير الفوتوغرافى ( الجزء الأول )

أشهر جمل ممكن تتقال داخل ستوديو مغمور فى مصر

- متطلعنيش تخينة

- هيه الحبايه دى ينفع تتشال ؟

- متطلعنيش وحشه

- صورنى بالجنب الشمال علشان بيطلع أحلى من اليمين

-فتحنى شويه وطلعنى بيضا اوى

- ينفع اتصور وانا قاعدة على الارض؟


- عايزاك تلونلى عنيا عسلى ..!!

- عايزة شعرى يطير ممكن تجيبلى مروحه ؟

- لو شايف حاجه مش مظبوطه قولى

- هوة الشبشب هيبان فى الصورة ؟

- عايزاها تكون حلوة وتنفع تتحط على التورته 

- بص لعمو يا حمادة وأضحك

-عايز ودانى الاتنين يبانوا علشان الجيش ؟

- عايز اشيل دقنى فى الصورة ...!

- صورة بحجاب وصورة من غيرة... !!

-عايزين نصوره بالبامبرز بس وهوة نايم على بطنه 

- خلفية بيضا علشان الباسبور

- عايز اتصور كرتين يا نجم 

- عايز كارت خيال ( زى دة كدة)

 


-ينفع اركب صورتين مع بعض ؟

-الأستلام أمتى ؟




الخميس، 19 أبريل، 2012

أكاذيب عن التصوير

تلاقى ناس بتقلل من تعبك او تحسسك كأنك بتعرق وانت بتلعب تنس 
لأ يابابا
لأ يا أخويا 
لأ يا حبيبى 

مش معنى ان التصوير الفوتوغرافى بيخلى المصور يتعامل مع الناس وهما فى أنضف حالاتهم وفى مناسباتهم السعيدة وانه مطلوب منه يبقى أنيق ومبتسم دائماً انه مش بيتعب ولا بيبذل مجهود

ردى على الناس اللى بتحاول دايماً تقلل من مجهود أى شخص أخر فى موضوع التصوير اللى يهمنى طبعا كالأتى 

جرب تمسك كاميرا وزنها بالعدسه بالفلاش حوالى 400 جرام وترفع بيها أيدك حوالى ساعه او ساعتين

جرب تقف تصور فرح بالكامل حوالى 8 ساعات متواصله مع العلم انك متابع كل حاجة بتحصل فى الفرح 

جرب تفكر تبتكر حاجة جديدة كل يوم (ملحوظة : لازم تبقى حلوة ) مع العلم أنك طالما من الناس اللى بتقلل من مجهود غيرك يبقى التفكير صعب عليك

جرب تحاول تطلع كل الناس زى ما هما بيحبوا يشوفوا نفسهم 

جرب تشتغل فى 1000 صورة على الفوتوشوب 

ومش معنى أنك بتعرق أكتر منى أنك بتتعب أكتر منى 

سمير عز 

الخميس، 16 فبراير، 2012

عم جميل......


القصه من البداية لما واحد صديقى ( مسيحى ) اتصل بيا جايبلى شغل عند واحد صنايعى فوتوشوب ( الكلام دة من 7 سنين على فكره)
وبمرتب حلو فسألت صاحبى ما تروح انتا قالى أصلى مسافر البلد واتحجج بكام حجة كدة مفهمتش منهم حاجة , المهم , الدنيا كانت مأشفرة فرحت قابلت الراجل فى ستوديو قديم جداً فى الجيزة ( أى حد ساكن فى الجيزة هيبقى عارف او على الاقل والدة او والدته اتصورا هناك )
ستوديو جميل 
راجل كبير شعرة أبيض وملامحة طيبة 
الاستوديو قديم جداً 
اتفقنا على يوم استلام الشغل ورحت لقيت كمبيوتر متهالك تحت سلم كدة جوة الاستوديو وكنت بشتغل بالليل بعد ما اخلص الاستويدو بتاعى فى السهرة 
عم جميل من اول الناس اللى كانت بتصور فى مصر وكان بيحكيلى انه كان بينقى الناس اللى بتتصور وهيه واقفه طابور قدام الاستوديو واللى مش عاجبة كان بيمشية وكان بيصور الصوره  بريال 
ويعمل رتوش بالطلب على النيجاتيف 
كان بيحكيلى ان الاستوديو اللى فاضى علينا دة ومفهوش ناس كان بيبقى خلية نحل عمال وزباين طوابير ومكانش فى استويدو تانى الا فى وسط البلد 
الغريب انه مكانش متضايق خالص ان الشباب خدوا منه الشغل اللى كان بيعمله ومكانش مقنع انه يجيب كاميرا ديجتال الا بعد الحاح من اصدقائة ومعارفه والا هيقفل الاستوديو ويقعد فى البيت وهوة رافض الفكرة دى تماما
عم جميل كان موسوعة فى التاريخ وخبرة فى الاشخاص 
عم جميل كان حافظ قرآن كتير اوى
وكان بيتسحر معايا فى رمضان 

عم جميل كان متعب جدأ لما بيقعد جنبى وانا بشتغل فى الصور اللى هوة بيصورها لانه ملهوش فى الكمبيوتر واتعلم التصوير الديجتال بالعافية 
كان بيركز فى حاجات غريبه جدا منها اللى كان صح ومنها اللى بيبقى اى كلام 
يعنى مثلا عم جميل علمنى ازاى افلتر الوشوش صح زى ما كان بيعمل زمان بالقلم على النيجاتيف وازاى افهم تفاصيل الناس ومين بيحب اية ومين بيحب يطلع ازاى 
وكان برضه ساعات بيركز فى حاجات من باب الكبرياء ( دا اللى كان مخلى صاحبى مش عايز يشتغل عنده ) وبعد رفضى والحاح منه اعملها واعمل Undo
(Ctrl Z ) قبل ما اسيف ولما الصورة تتطبع يقعد يقول شعر فى التعديل اللى انا مكنتش راضى اعمله فى الصور وانا اصلا معملتهوش :)



عم جميل كان عندة 70 سنه تقريباً وكان متفائل وبيحب الحياة 
عم جميل مكانش عندة فرق بين مسلم ولا مسيحى مع انه كان بيحب يصور الناس النضيفة بس 
عم جميل كان تقريباً مبقاش عندة شغل ولكنة مصر انه يشتغل 
عم جميل علمنى كتير اوى فى حياتى 
ازاى مبقاش مغمور 





الخميس، 22 ديسمبر، 2011

استخدامات كلمة صورة

كلمة صورة تتطور فى حياتنا تطور سريع نظراً لعامل السن والحياة من يوم تشريفنا على الدنيا ونتعامل مع هذة الكلمة وتتلخص فى الأتى حسب المراحل العمرية وبالترتيب التصاعدى

صورة للنونا 
صورة مع بابى 
صورة مع عمو وخالتو
صورة ابتدائى
صورة كارنية المدرسة
صورة للتأمين الصحى

صورة اربعه فى سته
صورة الشهادة
صورة مزة
صورة سكس
صورة سكس
صورة سكس
صورة سكس

صورة هيفاء الجديدة

صورة تامر الجديدة
صورة الكلية الحربية
صورة تقديم الشرطة
صورة كارنية الجامعة
صورة صاحبتى
صورة صاحبتى بتبوس صاحبى

صورة للشغل
صورة للتأمينات
صورة للباسبور

صورة خطوبتى
صورة خطيبتى الاولانية
صورة للمأذون

صورة الفرح
صورة المولود الجديد

صورة كبيرة بشريطة سودا على الجنب  للمرحوم صاحب الصور اللى فاتت دى كلها ( البقاء لله)

الجمعة، 11 نوفمبر، 2011

الكلمه كانت فى البدايه صوت ضمير


الكلمه كانت فى البدايه صوت ضمير
مش مين وفين وليه مش فارقه كتير
بحاول دلوقتى أكون انسان مش أسير
انا حر اختار اعيش ع الارض ولا اطير


الكلمه كانت فى البدايه صوت الحق
سوا كانت الحقيقه اه او كانت لا
انا الانسان ابدع الخالق فى خلقه
هدانى نور العقل للعالم شرق

الكلمة كانت فى البداية بأسمه أقرأ
لاجل ماتفهم وتتعلم لازم تبدأ
ماتسبش نفسك للى عايز يملى عقلك
يلغى فكرك وسيبك وسط البحر تغرق


زمان
كان الانسان بسيط وعارف
يقدر يحرك جبل وببصيرتة شايف
واثق ومش من حد غير ربة خايف

زمان
كانت الدنيا فانية فى قلوب الناس
كان العلم فى القلب مش فى الراس
كان الفير فقير بس الغنى عندة احساس

زمان والان
فرق توقيت فى روح وعقل انسان
كان عندة ارادة ملكة مش ملك شيطان
ومن اول خطوة ليه بيعمر أكوان


الكلمه..وعد

الكلمة عقد..

الكلمه صوت عالى يحرك بجد

..الكلمه فرحه..

الكلمة بنوته بطرحه..

تفتح شباك الحياه بفرحه..
.........................................

أشعار وتصوير 
محمد فؤاد عيسى 
سمير عز 

مونتاج 
كريم مصطفى 

موسيقى 
سامو فؤاد

الخميس، 20 أكتوبر، 2011

كرنفال الألوان - التقليد الأعمى للعبادات الوثنية

قد يغضب كلامى كثيراً من من يحبون الأستمتاع بالأمور دون النظر عما تحتوية من معانى خفية ولكنها كلمات لابد منها حيث انى اكتب ما أشعر بة 
....
مهرجان الألوان - Color Festival 


مهرجان الألوان  ينتشر فى مصر إنتشار النار فى الهشيم وقد تحمست كثيرا الى الذهاب انا وأسرتى حيث الأستمتاع وألتقاط الصور الملطخة بالألوان فى الهواء الطلق 


قررت الذهاب


كنت أجلس فى يوم عائلى وقلت عن المهرجان لقريبة لى تكبرنى فى السن وصدمت من ردها حيث قالت ان مهرجان الألوان هذا من طقوس عبادة هندية قديمة 


هندية ؟ !
عبادة ؟!
طقوس ؟!


تبلور الأمر فى ذهبى وقررت البحث حتى ان طال الأمر وصارحت زوحتى بتأجيل الذهاب الى المهرجان الى يوم أخر 


بحثت وتفاجأت من سهولة النتيجة التى وصلت اليها .....


حقيقة مهرجان الألوان ..


يسمى المهرجان دولياترا أو باسانتا أوتساب. و أكثر مهرجانات الربيع شهرتا هو ذلك الذي يقام في منطقة براج، في أماكن مرتبطة بالاٍله كريشنا: ماتورا، فريندافان، نانداغاون و بارسانا.



المهرجان له جذور في العديد من الأساطير الهندوسية المرتبطة انتصار الخير على الشر. واحدة من القصص المعروفة يحكي حكاية Holika، الذي حاول اغتيال براهلاد ، نجل الملك Hiranyakashyap  ، لرفضها العبادة والده
مهرجان من الألوان والرقص ، والحشود ، في معبد في فريندافان بيهارى بانكى ، على بعد حوالى 87 كيلومترا من نيودلهي ، في 18 مارس. فريندافان هو مكان الشهيرة للاحتفالات هولى.


صورة من داخل المعبد


سجود ( أستغفر الله العظيم )
أعتقد ان الأمر بدأ يتضح حيث اننا أصحبنا نتفنن فى التقليد الأعمى حتى اننا ننقل طقوس العبادات الوثنية دون تفكير فى عواقب الأمور 

الاثنين، 17 أكتوبر، 2011

فى البداية......


الكلمه كانت فى البدايه صوت ضمير
مش مين وفين وليه مش فارقه كتير
بحاول دلوقتى أكون انسان مش أسير
انا حر اختار اعيش ع الارض ولا اطير


الكلمه كانت فى البدايه صوت الحق
سوا كانت الحقيقه اه او كانت لا
انا الانسان ابدع الخالق فى خلقه
هدانى نور العقل للعالم شرق

الكلمة كانت فى البداية بأسمه أقرأ
لاجل ماتفهم وتتعلم لازم تبدأ
ماتسبش نفسك للى عايز يملى عقلك
يلغى فكرك وسيبك وسط البحر تغرق

زمان
كان الانسان بسيط وعارف
يقدر يحرك جبل وببصيرتة شايف
واثق ومش من حد غير ربة خايف

زمان
كانت الدنيا فانية فى قلوب الناس
كان العلم فى القلب مش فى الراس
كان الفير فقير بس الغنى عندة احساس

زمان والان
فرق توقيت فى روح وعقل انسان
كان عندة ارادة ملكة مش ملك شيطان
ومن اول خطوة ليه بيعمر أكوان


الكلمه..وعد

الكلمة عقد..

الكلمه صوت عالى يحرك بجد

..الكلمه فرحه..

الكلمة بنوته بطرحه..

تفتح شباك الحياه بفرحه..

كلمات محمد فؤاد عيسى - سمير عز