صورة مدرسة مصرية ...

فى يوم من الأيام جالى شغل تبع منظمة  (أو جميعة خيرية علشان الناس بتوع الماسونية ميقولوش جاسوس ) التصوير كان عبارة عن مشروع تصوير المدارس المصرية الحكومية لبحث تطويرها والعمل على الرقى بالتعليم المصرى , الغريب بقا انى جالى شغل فى نفس يوم عن تصوير  أطفال ال kg  (رياض الأطفال ) فى مدرسه لغات من أم خمس نجوم والأطفال اللى بتقول بليز وبتقول على البربور ( ياكى )

اتفقنا انا وأخويا محمد انه يروح الشغل بتاع الحكومة وانا اروح أصور المدرسة اللغات 

......

يوم التصوير الساعة 8.30 صباحاً بتصل بمحمد أخويا 

 أنا : ألو أيه الأخبار عندك ؟

 أخويا  : ربنا يجازيك العيال كلها عيانة وعندهم حصبه ألمانى وبيقولوا العدوى شغالة وانا هيدونى تطعيم 

 أنا : تطعيم ؟!!! ربنا يوفقك بقا 

أخويا  : وأنتا ايه الأخبار عندك ؟

أنا : أنا بسقى بسكويت فى الشاى عقبال ما الأطفال ترتاح من المشوار بتاع الباص والمدرسات تعمل ميك أب 

أخويا : أقفل طيب علشان مشتمكش 

.......

الساعة 9.00 بتصل بمحمد أخويا 

أنا : صحيح انتا مقولتليش أنتا فى مدرسة أسمها أيه ؟

محمد : مدرسة طابا الأبتدائية المشتركة والأطفال يتختصر الأسم وبتقول طابا الخرابا 

أنا : طيب بلاش بقا أقولك أنى فى المدرسة الحديثة للغات 

محمد: أقفل علشان انا مش طايق المدرسة ولا طايق أتكلم 

صورة رمزية 

.....

الساعة 10.00 محمد أتصل بيا 

محمد : لو خلصت تعالا ألحقنى مش عارف أصور العيال مبرشمه

أنا : لأ مش هينفع أنا لسة هطول شوية علشان لسه الأطفال عندهم حصة موسيقى وتلوين 

.... 

الساعة 11.00 أتصلت بمحمد

أنا : خلصت ولا لسة ؟

محمد : لسه عايزين يصورا الأطفال وهما فى غرفة الكمبيوتر ومش لاقيين المفتاح بتاعها 

أنا : طيب يكسروا الغرفه علشان تخلص شغلك وتمشى انتا 

محمد : لأ ما لما الغرفة تتفتح هيجيبوا كومبيوتر من سايبر جنب المدرسة إيجار ويرجعوة تانى 

أنا : طيب أنا هقبض العربون بتاع الطباعة وأكلمك تانى وانا ماشى أطمن عليك 

......

الساعة 12.00 أتصلت بمحمد 

أنا : خلاص انا ماشى وخدت العربون 1000 جنية علشان أطبع الصور

محمد : طيب الحمد لله أنك خلصت تعالى خدنى بتاكسى بقا من المدرسة اللى انا فيها 

أنا : ليه ما نتقابل فى الاستوديو 

محمد : لأ ما انا اتنشلت منى المحفظة بتاعتى وفيها كل الفلوس وحاليا بيفتشوا 480 طفل علشان يطلعو المحفظة بس انا فقدت الأمل ومستنيك 

أنا : أنا جايلك فى الطريق حالاً..........

.......

صورتى وأنا فى الجيش

كام واحد دخل الجيش ؟

طيب كام واحد فاكر صورة الجيش بتاعة التعبئة ؟

فاكر أصحابك فى الوحدة ؟

معاك صور ليهم ؟

......

السلام عليكم

- وعليكم السلام

-عايز أطلع على الصورة دى يا كا بتن لوسمحت ( صورة مجموعة من الشباب لابسين مموه ومقرفصين على الأرض ومنهم اللى بيأكل نص بطيخة واللى فى أيدة شوية لب أبيض وواحد بيشرب سيجارة وحاول عينية وباصصلها بعشق وسرحان ومع أنهم متصورين فى الشمس وواضح فى الصورة أنهم عارقانين الأ انهم شكلهم مش متضايق )

- عنيا الأتنين  يا دفعة 

قعد على الكرسى جنبى وبدأ يتكلم بلهجة فيومية بنى سوفية 

- هوة أنتا دخلت الجيش؟

- لأ الحمد لله محصليش الشرف بس أتفرجت علية أصحابى حكولى 

-عارف الجيش بيعرفك على ناس عمرك ما تفكر أنك تعرفهم قبل كدة ( قديمة وسمعتها كتير أوى من أصحابى ) وسيبك انك بتشوف الويل ووساخة من ناس وسخة وذل من كان ظابط وساعات بيبقى فى مد أيد كمان 

- ( الحمد لله أنى مدخلتش ) مش دايماً ياعم فى ناس مرتاحة 

- لأ مرتاحة أية دا احنا انا والعيال اصحابى دول كنا بنشوف الويل ياجدع دا احنا كنا تحت ظابط بيأكل عيال صغيرة وبيشم بارود وعلى كدة دى كانت أحسن أيام فى حياة الواحد والله , سيبك من أنهم عيال وسخة بس الواحد مننا عرف مين الراجل ومين اللى مش راجل ومين اللى أصيل ومش قليل الأصل , خد عندك مثلاً المنايفة مش بيقولوا عليهم بخلاء ومعفنين لأ والله عرفت واد بميت راجل 

وكان عندنا شاويش دمياطى ومروقنا أجازات 

-هوة انتا كنت فى سلاح أية ؟

- سلاح المنجدين أصل انا منجد أفرنجى 

- ياعم أومال لو كنت فى حرس الحدود كنت عملت فينا أيه ؟

- ومين قالك أننا مشفناش شقا ومرمطة , دا احنا كنا بننام واحنا واقفين زى الخيل وبنشتغل ليل ونهار أشى كنب وأنتريهات وأشى ستاير وفوتيهات أومال انتا فاكر أن الباشا الظابط هيعرف يشتغل من غير ما يكون قاعد على كرسى متنجد صح , وأحنا كنا بننام على خشب بس مهم أهى أيام والله كانت حلوة , العيال وحشونى أوى ولاد الكلاب كل ما أفتكر اننا قعدنا 3 سنين نأكل سوا ونشرب سوا ونحشش سوا كانت أيام حلوة والله 

- تحششوا ؟؟؟

- أة ياعم أومال انتا فاكر اية فالجيش يوم كدة ويوم كدة دا انا كنت اعرف واحد فى منطقة التدريب كان هيموت ويشرب سيجارة بانجو وكان صعبان عليا الواد مدمن بجد, تخيل بقا  بتصل بية بعدها بشهرين لقيته فى القوات اللى راحت تحرق غيطان البانجو اللى كانت مزروعة فى الصحرا أبن الكلب المحظوظ مبقاش يشرب بالسيجارة بقا دا بيولع فى الغيط ويقعد يشد من الزرع يعنى شرب بانجو يكفية 10 سنين كمان 

- ( ضاحكاً ) طيب وانت زعلان لية مش أنتا منجد

- ( وهوة متضايق أوى ) أة منجد بس بشرب بانجو 

عن النجاح وإبراهيم الفقى

قرأت كتير أوى فى علم التنميه البشريه ظناً منى انها الطريق الوحيد للنجاح والتفوق وربح الأموال والرضا عن النفس لكن وبعد سنين فى الشغل والشقا والتنطيط فى كل الأماكن لقيت الموضع أبسط من الكلام اللى قريته بتاع أحضن نفسك وخد شهيق كبير وطلع الزفير من ودانك

 لألألألألأ الموضوع مش كدة خالص أوى بمعنى أخر مش بالصعوبه دى ولا بالمصطلحات

  بحكم عملى فى التصوير الصحفى فى مجلة أحنا اتاحت ليا فرص عظيمه انى اقابل كم 

هائل من الشخصيات الناجحه فى كل المجالات واتكلم معاهم واقارن بينهم واطلع الاختلافات والتشابه

 أمثلة :

 ايه التشابه بين تامر حسنى ومحمود سعد ومصطفى حسنى وأحمد مكى وابو تريكه   

عبد الباسط حمودة 

طبعاً تناقض قوى  بين الأسماء تخيل بقا كمان لو ضيفنا عليهم أحمد سبايدر .....

الإختلافات اللى بينهم كتير جداً  وغالباً لا يتفقوا فى أى صفه من صفاتهم 

وتتنوع ما بين مثقف ومدعى وفاهم وجاهل  وموهوب وهادف وسفيه 

بس فيهم حاجه واحد خدت بالى منها صفه واحدة بس  تكاد تكون متماثله 

ايه التشابه اللى بينهم فى حياتهم اللى خلانا كصحافه ندور عليهم ونهتم اننا نقعد معاهم ونصورهم كمان 

لأن كلهم نجحوا بصرف النظر عن مفهوم النجاح الأكاديمى انما على الأقل كلهم نجحوا فى أنهم يوصلوا للى هما نفسهم فيه 

راجع بقا معايا مين منهم بيواظب على تمارين الشهيق واطلق المارد بداخلك وأصنع من الليمون عسلاً  والكلام دة 

لأ المعادله أبسط من كدة فكر ونفذ وصمم ومهما حد حاول يقولك أنك غلط أو فاشل أو مش مجالك متسمعلوش

أطلع من نطاق المألوف والعيب , الموضوع سهل و النجاح قريب

ولو فى صعوبات فى الطريق اللى انتا بتحبه هتستمتع وانتا بتتغلب عليها ......

دا التشابه الوحيد اللى شفته فى كل مشاهير الأدب والفن والسياسه وحتى مشاهير الهلس والهشك بشك ومدعيين العلم 

شكراً أستاذ إبراهيم الفقى الموضوع أبسط من كدة 

سمير عز 

من كتاب يوميات مصور مغمور ( مش مغمور أوى يعنى )
هذة التدوينة برعاية أحمد الطويل

العنب العنب العنب ....

سؤال يحيرنى للفنان سعد الصغير وجميع الفنانين ومحبين الفن 

هل فعلاً العنب بيطلع فى الشتا والصيف ؟

أم هى خطاً  شائع ؟

ياريت اللى عندة الأجابة يبعتهالى فى رسالة علشان الموضوع محيرنى جداً 

بروفايل بكتشر

لما الفيس بوك طلع ( أو نزل مش هتفرق يعنى ) ظهرت حمى فيسبوك البحر المتوسط وكانت معديه وسريعة الانتشار

المرض بتظهر اعراضه بحب شديد لتغييرصورة البروفايل بكتشر كل كام يوم بصورة جديدة وتكون مميزة لجلب كميات كبيرة من الكومنتات وأعداد كبيرة من اللايكات سيبكوا من أنها حاجة بتكسبنى طبعاً لما كل الناس تبقى عايزة تتصور كل يوم 

أنما فعلاً البروفايل بكتشرشغلت حيز كبير من تفكير الشباب المصرى لفترة كبيرة وأعتقد أنها مازالت لما يبقى هدف الشاب أو البنت على مدار اليوم أنه يتصور أو يصور صورة علشان يعملها بروفايل بكتشر وتعمل كام كومنت وتجيب لايكات كتير بصرف النظر عن أن الصورة دى ممكن تبقى لية هوة أو ليها فى وضع مخل أو بشكل عبيط وفكاهى  وتطور الموضوع ووصل لمرحلة أنه بقوا بيشتغلوا مراسلين صحفيين يعنى يشوف مثلاً مشكلة يصورها أو ينزل الكربة علشان يصور الناس ويعمل ألبوم ويسمية يوم فى الكربة 

وجروبات بقا من عينة أحلى بنت على الفيس بوك وأحلى كابلز لأ وكمان أحلى ولد لابس نضارة شمس ومتصور على البحر فى راس البر 

وكل كومنت تلاقى تحته كومنت تانى من صاحب الصور بيشكر اللى قبلة وبيقولة انه هيردلوا الكومنت أول ما يرفع صور جديدة وكل ما تكتبلى كومنتات أكتر أحبك أكتر 

لما مصر بتكسب ماتش تانى يوم تلاقى ألاف الصور على الفيس بوك لبنات ماسكة أعلام وشباب داهنين وشهم بألوان العلم وصور بنات بيتحرشوا بيها فى الشارع 

وكلة بقا والثورة من أول 25 يناير لغاية ما انا بكتب الكلام دة أعتقد أن حوالى 90 % من اللى نزلوا ميدان التحرير كانوا رايحين يتصورا 

وتقريباً فى الفترة دى محدش من شباب مصر على الفيس بوك تقريباً محطش صورة لنفسة وهوة ماسك علم وفى ميدان التحرير 

كنت من كام يوم بطرح فكرة على أحمد صاحبى وخصوصاً بعد موضوع الجواسيس اللى مصر فرحانه أوى انها بتمسكهم  وقعدت أفتكر أيام ما كان عادل امام فى جمعة الشوان بيقولوة عايزين نعرف المصريين بيحبوا أية وبيعملوا أية والرأى العام لأنة مكانش ساعتها بيتنشر فى الجرايد وانا كل ما أفتكر دلوقت أضحك دلوقتى الجاسوس من دول ممكن يوفر على المخابرات بتاعته بدل الأنتقال ويدخل على الفيس بوك ويضيف كام واحد مصرى وهوة هيعرف كل المعلومات ومش بس كدة دا ممكن يشحن كارت بعشرة لواحدة من بتاعة أشحنلى وافرجكك وهيه تنزل بنفسها تصورلة المنطقة العسكرية اللى جنب بيتهم وتجيبلة مقاسات الملابس الداخلية بتاعة عسكرى عسكرى والله هم يبكى وهم يضحك 

كمان بيضيفوا فى الفيس بوك أضافات جميلة جدا زى الأسئلة question  تسأل السؤال وتستنى نتيجة الأستفتاء وانا من موقعى هذا بقترح ان لو فى استفتاءات تانى عن مواد فى الدستور وخلافة تتعمل على الفيس بوك بقا بدل الطوابير والزحمة والقرف وكدة كدة مفهاش حاجة سرية ولوفيها حاجة سرية ما العالم كلة هيعرفها تانى يوم لما مصر تكتب عنها دا غير أنهم عندهم تقريباً بيانات فرد فرد بصورة بأرقام تليفوناتة بهواياتة كمان , بجد مش مصدق أزاى الناس لسة متخيلة فكرة الجاسوس بتاع زمان أحنا بقينا جواسيس على نفسنا وبكل بساطة والمصيبة كمان اننا مبناخدش فلوس على كدة جتنا نيلة عالم فقرية 

كفاية كدة بقا علشان انا حاسس انى هدخل فى الكلام عن الماسونية وبكرة هتتعمل فيديوهات عليا زى عمرو مصطفى :)

كيف تصبحين موديلز ... ؟

( فى اللغة المصرية العامية الحديثة تم الأتفاق على أن الموديل الواحدة يقال عليها موديلز وحتى الأن غير معروف سبب ذلك ولا مصدر هذا الخطاً الشائع )

والأن الطريقة السحرية للبنت العصرية اللى عايزة صورها تنتشر فى كل حته على الأنترنت وتبقى معروفة ويبقى بيكلمها كل يوم كام مخرج على كام مصور على شوية جمهور معجبين بشغلها  على كام عريس هيموت ويتجوزها وكام واد مز عايز يصاحبها كام يوم وتروح معاه الساحل يعنى هترزق وهتتبسطى على الأخر

الطريقة سهله جداً ومش محتاجة فلوس  المهم تفتحى مخك وتفهمى كويس وتنفذى صح

اولاً : الجسم

لازم تهتمى بجسمك  لأن دة محور الموضوع لما تخلى على مصور علشان تتصورى لازم يتخض ويقول دا انتى تحفة انتى كنتى فين من زمان ياريتك تتصورى عندى كل يوم . وسيبك بقا من الكلام الفاضى بتاع الخمسين كيلو دة والطول الحاجات دى قدمت خلاص

الموديلز دلوقتى لازم تبقى صحتها حلوة وتبقى فوق ال80 كيلو كدة ومش مهم الطول  المهم تملى اللبس اللى هتعرضية يعنى كلى براحتك ولو حد عايزك تشتغلى معاة فى حاجة يبقا يخسسك هوة بقا كفاية عليكى انتى انك هتلبسى أصلاً

ثانيا : اللبس

أكثرى عزيزتى حواء من  الملابس الضيقه وأظهار الكرش والمناطق السمينة فى جسمك ( حته من برنامج لكى يا سيدتى ) 

ولو أهلك مش موافقين أنك تقلعى الحجاب ميضرش أعملى كل اللى نفسك فيه من غير ما تقلعى الحجاب . يعنى بنتاكور ماشى 

جيبه مفتوحة متضرش دا انتى حتى ممكن تعملى صور فاشون بكينى المحجبات وتاخدى ثواب 

وعليكى بالأهتمام بالبادى الكارينا الأصلى مش التقليد اللى بيبقى مبين كل جسمك بتفاصيلة ولما بيبقى جوة بنطلون جينز أسترتش بقا بيبقى تحفة 

ثالثاً : البرفان بين قوسين البرفيوم

عليكى وعلى البرفانات الخليكى بقا المستوردة أم 35 جنية وأوعى تسترخسى وتجيبى البرفانات أم 11.5 علشان مبتلحقش تقعد على الجسم وهرشحلك أنواع هتعجبك أوى جبتهم من منتدى فتكات علشان البنات اللى هناك أواريب فى الحاجات دى خدى عندك يا ستى 

برفان زهرة البلوط - برفان ليالى الحلمية - برفان أم المصريين ( هيه عندها مستشفى ومصنع برفانات يعنى بتقلب عيشها )

ولما تقدمى كدة هيبقى المخرج من دول يشم ريحتك وعبقك يعرف على طول أنك الموديل اللى كان بيحلم بيها تنور كليباتة وتبقى بطلتة الدائمة 

رابعاً : الميك أب 

سموكى أيز مع ترفيع الحواجب جداً وضربهم بصبغة فاتحة والشعر يبقى غامق أو العكس وركزى على الميك أب الأوفر قلدى نجمات الفاشون بتوع أوربا بيبقوا ملونين وطالعين زى القمر وهما أصلاً من السنغال فى الحقيقة والرك بقا على الميك أب 

خامساً : الأنتشار

متسبيش كافية فى شارع  جامعة الدول الا لما تعلمى علية وتسيبى بصمتك وعموماً وأنتشرى كمان فى قهوة البورصة ووسط البلد اللى بيقعد عليها المخرجين والفنانين اللى سايبين شعرهم 5 سنين من غير حموم  وأشربى سجاير كتير فى الأماكن العامة علشان الناس تعرف أنك موديلز وياريت من الأنواع الرفيعة اللى بتبين قد أية انتى رقيقة ومتسبيش طفاية ألا لما تطفى فيها كام سيجارة والروج بتاعك يبقا معلم فيهم 

الفيس بوك بقا محتاج تركيز لازم تعملى أكونت وبيدج وجروبوتحطى صورة دلع وتضيفى كام مخرج على كام فنان وكل ما تحطى صورة ليكى تعملى عليها تاج لغايه ما الناس تضيفك كتير أوى 

وأخيراًُ دا وجة من أوجة العملة اللى بنتعامل معاها وكامل أحترامى للوجة الأخر وشكراُ

صورة تصليح ...

فى يوم من أيام الشتاء والناس من بدرى دفاينة فى السراير دخل عليا راجل طيب ملامحة مصرية فلاحة واضح علية الشقاومش باين علية انه بردان خالص المهم دخل بخطوات مترددة بيقدم خطوة وبيأخر خطوة كأنة مكسوف يدخل الأستوديو قال :

- سلام عليكم

- وعليكم السلام . اتفضل

_ عايز منك خدمة يا بنى

- أأمرنى يا حاج أنا فى الخدمة

_ لو معايا صورة مقطوعة وعايز اصلحها ينفع ؟

- اة ان شاء الله ينفع يا حاج الكمبيوتر بيعالج الحاجات دى

- حتى يا بنى لو مقطعة على أكتر من حته ؟

- اة ياحاج حتى لو أكتر من حتى ولو أبيض وأسود ممكن تتلون

( لمعت عينية بلمعة غريبة وبريق الأمل بينط منهم ) وقال :

- طيب ينفع تعمل بقا الصورة من الأول ؟

- يعنى ايه يا حاج مش فاهم

- يعنى انا اوصفهالك وانتا تعملها

- (بدات كدة أفهم ) لأ والله يا حاجه مبعرفش ارسم

- بس يا بنى بيقولوا ان  الكمبيوتر بيعمل كل حاجه

- مش دايما يا حاج بينفع فى حاجات وحاجات

- طيب يا بنى انا ممكن ادفع اللى انتا عايزة بس تخلينى اشوف الصورة دى مرة واحدة بس

- ياريت كان ينفع يا حاج مكنتش هتأخر عنك

- طيب بص نا معايا صورة ليها وهيه صغيرة ( بيطلع صورة من جيبة صورة قديمة جداً أبيض واسود لطفلة )

-مقدرش اطلع غير على الصورة دى واصلحها أنما مقدرش اجيبلك شكلها وهيه كبيرة للأسف

 بص الراجل فى المجهول  واختفت منه نظرة الأمل اللى كانت فى عنيه وسرح وهوة بيتمتم للأسف للأسف 

وقام وقف وكانى مش موجود وراح على الباب وسمعته بيقول للصورة :

ياريتنى كنت صورتك 

بس للأسف

للأسف 

...........